डाेटी/राष्ट्रिय जनमोर्चा डोटीले जिल्ला प्रशासन कार्यालय मार्फत प्रधानमन्त्रीलाई ज्ञापन पत्र बुझाएको छ । विभिन्न माग राख्दै शुक्रबार प्रमुख जिल्ला अधिकारीलाई ज्ञापन पत्र बुझाएको राष्ट्रिय जनमोर्चाका जिल्ला अध्यक्ष डबल बोगटीले जानकारी दिए ।
गणतन्त्रलाई कमजोर पार्दै प्रतिगमनतर्फ लैजान देशीविदेशी शक्तिले षडयन्त्र गरिरहेकाले सरकार गम्भिर हुन ज्ञापनपत्रमा उल्लेख गरिएको छ । सरकारलाई राष्ट्रियता प्रति गम्भिर हुन र कालापानीको बिषयलाई अन्तराष्ट्रियकरण गर्न ज्ञापनपत्रमा भनिएको छ ।
नेपालको थुप्रै भुमि भारतले अतिक्रमण गरेको र अतिक्रमण भएको भु-भागलाई अबिलम्ब फिर्ता लिन नेपाल सरकारलाई माग गरिएको छ । नेपाललाई विदेशीको क्रिडास्थल हुन नदिन एमसिसि सम्झौता तुरुन्तै खारेज गर्न समेत ज्ञापनपत्रमा भनिएको छ ।
त्यसैगरी राज्यमाथि धर्मको प्रभाव रोक्न र संघीयता खारेजको समेत माग गरेको छ । नेपालमा बढ्दो महङ्गी, बेरोजगारी, भ्रष्टाचार, कालोबजारीको नियन्त्रणका लागि समेत सरकारको ध्यानाकर्षण गराएको छ । यदि आफुले राखेका माग पुरा नगरे सरकारका बिरुद्ध जनताका बिच सडकमा जाने समेत ज्ञापन पत्रमा उल्लेख गरिएको छ ।
