गणेश मौनी
डोटी/वर्ल्ड भिजन ईन्टरनेशनल नेपालको सहयोगमा समान पहुँच बिकास केन्द्र डोटीले आयोजना गरेको पाँच दिने बाल संरक्षण तथा आत्मरक्षा सीप सम्बन्धी प्रशिक्षक प्रशिक्षण तालिम मंगलबार सिलगढीमा सम्पन्न भएको छ ।
आदर्श गाउँपालिका अन्तर्गत रहेका साथी शिक्षकहरुलाई दैनिक जिवनमा आईपर्ने विभिन्न व्यवहारिक ज्ञानहरुको बारेमा जानकारी गराउने उद्देश्यले तालिमको आयोजना गरेको समान पहुँच विकास केन्द्र डोटीका बाल संरक्षण तथा बाल स्पोन्सरसीप परियोजना संयोजक सुनिल जोशीले बताए ।
पाँच दिनसम्म संचालन भएको तालिममा बाल अधिकार, विश्वासीलो ब्यक्ति पहिचान, प्रभावकारी सञ्चार सिप, ब्यक्तिगत सरसफाई, कुलतबाट बच्ने उपायहरु, महिनावारीको समयमा गरिने सरसफाई तथा ब्यवस्थापन, बालबिबाह, यौनजन्य हिंसा र आत्मरक्षाका सिपहरुको बारेमा लगायत विभिन्न विषयमा छलफल गरिएको परियोजना संयोजक जोशीले बताए ।
तालिममा सिकेका कुराहरुलाई आफुले ब्यवहारमा कार्यान्वयन गर्नुका साथै गाउँघरमा अरुलाई पनि सिकाउन आवश्यक रहेको वर्ल्ड भिजन ईन्टरनेशनल नेपालका स्पोन्सरसीप फिल्ड कार्डिनेटर गांगी बलायरले बताए । उनले भने ‘जीवन उपयोगि शिपहरुको बारेमा हरेक बालबालिकालाई जानकारी दिनु आवश्यक छ ।’ तालिमको समापन गर्दै फिल्ड कोडिनेटर बलायरले प्रत्येक स्थानीय सरकारले बालबालिकाहरुलाई आत्मरक्षा सम्बन्धीको ज्ञानको बारेमा जानकारी दिन आवश्यक नीति तथा बजेटको ब्यवस्थापन गर्न आवश्यक रहेको समेत बताए ।
तालिममा आर्दश गाउँपालिका अन्र्तगतका १६ जना साथी शिक्षकहरुको सहभागि रहेको थियो जसमा १२ जना दर्ता भएका आरसी बालबालिकाहरु समेत रहेका थिए । तालिम पुस २९ गतेदेखी माघ ३ गतेसम्म सिलगढीमा संचालन भएको थियो ।
सम्बन्धित खवर
