गणेश मौनी
डोटी/सुदूरपश्चिम क्षेत्रीय प्रहरी अस्पताल दिपायलकी प्रमुख प्रहरी नायब उपरिक्षक एवं स्त्री रोग विशेषज्ञ डा.सबिता सिंहले अस्पतालमा सेवा लिन आउने सेवाग्राहीहरुलाई गरिने उपचारका साथै उनिहरुसंग गरिने बोली ब्यवहार पनि उत्तिकै महत्वपूर्ण रहेको बताएकी छन् ।
उनले भनिन् सेवा लिन आउने सेवाग्राहीलाई छिटो छरितो तथा गुणस्तरिय सेवा प्रवाह गर्ने हाम्रो मुख्य दायीत्व नै हो त्यसका साथै सेवाग्राही के भएर अस्पताल आएका हुन उनको कुरा सुन्ने, बुझ्ने सोही अनुरुपको उपचार गर्नुका साथै बिरामीलाई शान्तोना दिंदा, हौसला दिंदा बिरामीहरुको मनोबल बढ्ने भएकाले उनिहरु संगको बोली ब्यवहार पनि अति नै महत्वपूर्ण हो ।
प्रहरी अस्पतालमा अहिले सम्म सेवा लिन आएका बिरामीहरु सन्तुष्ठ भएर घर फर्केको अनुभव डा. सिंह संग छ । केही सेवाग्राहीहरु सुरुमा अन्य अस्पतालमा उपचार गर्न जान्छन् त्यहा ठिक नभएपछी प्रहरी अस्पतालमा आएर सेवा लिई ठिक भएर घर फर्केका समेत बताइन् ।
रोग लाग्नु भन्दा रोग लाग्नै नदिनु सबैभन्दा उत्तम उपाय हो डा. सिंहले भनिन् हरेक ब्यक्तीले ब्यक्तिगत सरसफाई, नियमीत स्वास्थ्य चेकजाँच, खानपान, नियमित ब्यायाममा ध्यान दिन आवश्यक देखिन्छ । प्रहरी अस्पतालमा बढीजसो पाठेघरको संक्रमण, बाझोपन, महिलाहरुको तल्लोपेट दुख्ने जस्ता बिरामीहरु आउने गरेको भएपनि सामान्यतया रुघाखोकी, चोटपटक लागेको, छालाको संक्रमण, नसाको समस्या, सुगर, प्रेसरका बिरामीहरु पनि आउने गरेको समेत डा. सिंहले बताइन् ।
प्रहरी अस्पतालमा उपचार सेवा छिटो छरितो र गुणस्तरीय रहेको दिपायलका स्थानिय बासी शंकर द्वारीयाले बताए । अन्य अस्पतालमा जाँदा धेरै समय लाग्ने, लाईनमा बस्नुपर्ने उपचार पछी रिपोर्ट ढीला आउने, सामान्य उपचारको लागि पनि दिनभर कुर्नुपर्ने हुन्छ तर प्रहरी अस्पतालमा तुरुन्त उपचारका साथै रिपोर्ट पनि तुरुन्त आउने गरेको द्वारीयाले बताए ।
प्रहरी अस्पतालमा सेवा लिन आउनु भएकी आदर्श गाउँपालिका १ की राजमती खड्काले छोरा छोरी घरपरिवार बिरामी हुदाँ प्रहरी अस्पतालमा आउने गरेको बताइन् । उनले भनिन् ‘अन्य अस्पतालमा जाँदा पंैसा घेरै लाग्छ, उपचार पनि ढीलो हुन्छ, धेरै समय कुर्नुपर्ने हुन्छ तर यहाँ पुग्नु मात्र हो उपचारको काम फटाफट हुन्छ सस्तो शुल्कमा प्रहरीले सहयोग गरिदिन्छन् ।’
दिपायल स्थित सुदूरपश्चिम प्रदेश प्रहरी तालिम केन्द्र दिपायल संग जोडिएको सुदूरपश्चिम क्षेत्रीय प्रहरी अस्पतालले बहालवाला नेपाल प्रहरी र भुतपूर्व प्रहरीहरुलाई मात्र नभई आम सर्बसाधारणको लागि समेत सहज रुपमा सेवा लिन पाउने ब्यवस्था गरेको अस्पतालले जनाएको छ ।
अस्पतालमा सेवा लिन सबैभन्दा बढी दिपायल सिलगढी नगरपालिका र आदर्श गाउँपालिकाबाट आउने गरेको भएपनि अन्य स्थानबाट पनि सेवाग्राही आउने गरेको अस्पतालले जनाएको छ । क्षेत्रीय प्रहरी अस्पतालमा बिहान ९ बजे देखि ३ बजेसम्म ओपिडि सेवा चल्ने गर्छ भने आकस्मीक सेवा २४ घण्टा खुल्ला रहेको हुन्छ । अस्पतालले ओपिडि सेवा सामान्य रोगको चेकजाँच, सर्जन सेवाको लागि परामर्श, ल्याब सेवा, फिजियोथेरापी सेवा पनि उपलब्ध गराउदै आएको छ ।
सुदूरपश्चिम क्षेत्रीय प्रहरी अस्पतालले धनगढीमा पनि शाखा खोलेर सेवा प्रवाह गर्दै आईरहेको छ ।
