गणेश मौनी
डोटी/युनाईटेड मिसन टु नेपाल डोटी क्लष्टरले डोटीका भूकम्प प्रभावितहरुलाई त्रिपाल सहयोग गरेको छ । डोटीको सायल गाउँपालिका वडा नम्बर ६ साउदनाराका १ सय ५० जना प्रभावितहरुलाई त्रिपाल सहयोग गरेको युएमएन डोटीका सुशासन परियोजना व्यवस्थापक खेम भण्डारीले बताए । उनले भने, ‘भूकम्पका कारण सायल गाउँपालिकाका अधिकांस घरहरुमा समेत क्षति भएकाले त्रिपाल सहयोग गरेका हौं ।’
सायल गाउँपालिकाको समन्वय तथा वडा कार्यालयको रोहबरमा सोमबार युएमएन डोटीले प्रभावित गाउँमै गएर प्रभावित परिवारलाई हस्तान्तरण गरेको हो ।
भूकम्पले गर्दा सायल गाउँपालिकामा अधिकांश घरहरुमा क्षती गरेको सायल गाउँपालिकाका अध्यक्ष धर्मराज जोशीले बताए । उनले गाउँपालिकालाई अति आवश्यक रहेको त्रिपाल युएमएन डोटीले सहयोग गरेको प्रति धन्यबाद समेत ब्यक्त गरेका थिए ।
युएमएन डोटी क्लष्टरले भूकम्प प्रभावितहरुलाई बिपत ब्यवस्थापन कोषबाट त्रिपाल सहयोग गरिएको युएमएन डोटी क्लष्टरका लेखा संयोजक खडक सुनारले बताए । १ लाख ९१ हजार २ सय ५० रुपयाँ बराबरका त्रिपालहरु सहयोग गरिएको उनले बताए ।
युएमएन डोटीले यसभन्दा पहिले डोटीको पूर्बीचौकी गाउँपालिकामा रहेका भूकम्प प्रभावितहरुलाई पनि २ सय थान न्यानो कम्बल गाउँपालिका मार्फत सहयोग गरेको थियो ।
