बन्दना बम, डोटी- नेपाली काँग्रेस डाेटीका पार्टी सभापति तथा प्रदेश सभा ‘क’ का गठबन्धनका साझा उम्मेदवार नरेन्द्रबहादुर सिंहले मंसिर ४ को निर्वाचन जीतेपछि डाेटीको समग्र विकास, समुदायको अधिकार स्थापित गर्ने कुरामा पछि नहट्ने बताएका छन् ।
सोमवार दिपायल सिलगढी नगरपालिकाको लडागडा लगायतका ठाउँमा लोकतान्त्रिक बाम गठबन्धनको चुनावी सभामा बोल्दै यस्तो बताएका हुन् ।
संविधानको रक्षा र मुलुकको आर्थिक समृद्धिका लागि मंसिर ४ को निर्वाचन ऐतिहासिक हुने सिंहले बताएका छन्।
प्रदेश सभा ‘क’ का उम्मेदवार सिंहले जनताका हक अधिकारलाई स्थापित गर्न र अधुरा विकास योजनाहरूलाई सम्पन्न गर्न तथा रोजगारी सृजना हुने ठुला विकास योजना सञ्चालन गर्न गठबन्धन दलका उम्मेदवारलाई विजयी गराउन आग्रह गरे ।
सभापति सिंहले ७० वर्षको नेपाली जनताको सङ्घर्षपछि जारी गरिएको संघीय लोकतान्त्रिक गणतन्त्रको रक्षाका लागि पनि मतदाताले गठबन्धन दलका उम्मेदवारलाई विजयी गराउनु पर्ने बताए ।
उनले भने, ‘संविधानको रक्षा गर्न, शान्ति प्रक्रियाका बाँकी कामहरू पूरा गर्न र अधुरा विकास योजनालाई पूर्णता दिँदै विकासको द्रुत रूपमा अगाडि बढ्ने छाैं ।’
कार्यक्रममा नेपाली काँग्रेसबाट प्रतिनिधि सभा समानुपातिक उम्मेदवार प्रशिस महरा,प्रदेश समानुपातिक उम्मेदवार कुमार सिं टेलर , नेकपा माओवादी केन्द्रबाट समानुपातिक उम्मेदवार गीता शोप नेपाली, पूर्णराज जोशी लगायत लोकतान्त्रिक वाम गठबन्धनका नेता कार्यकर्ताहरूको उपस्थिति रहेको थियो ।
