धनबहादुर बोहरा,
डोटी/आज डोटीमा आठौं राष्ट्रिय सुरक्षित गर्भपतन दिवस विभिन्न कार्यक्रम गरी मनाइएकाे छ । ‘सुरक्षित गर्भपतन अपराध होइन अधिकार हो’ भन्ने मूल नाराका साथ यो दिवस मनाइएकाे हो । स्वास्थ्य कार्यालय डोटीको आयोजना तथा प्रजनन् स्वास्थ्य तथा सुरक्षित गर्भपतनका क्षेत्रमा काम गर्दै आइरहेका आइपास तथा सामुदायिक विकास मञ्चको सहकार्यमा अन्तरक्रिया कार्यक्रम गरिएको छ । त्यसैगरी परिवार नियोजन डोटीले समेत महिला स्वयंसेविका तथा सम्बन्धीत व्यक्तिहरुसंग दिवसको अवसरमा अन्तरक्रिया कार्यक्रमको आयोजना गरेको छ ।
कार्यक्रममा बोल्दै जिल्ला समन्वय समितिका संयोजक लक्ष्मणबहादुर सिंहले मानव स्वास्थ्यलाई ठिक ढंगमा राख्न महिला स्वयंसेविकाहरुको महत्वपूर्ण भूमिका रहेको बताए । ‘ग्रामिण भेगमा स्वास्थ्यमा समस्या आउँदा पहिले स्वयंसेविकालाईनै खबर गर्ने भएकाले तपाइहरु गाउँको डाक्टर हो’, संयोजक सिंहले भने, ‘डाक्टरले गर्ने कामको सुरुवात तपाइहरु मार्फत हुने गर्दछ ।’
सुरक्षित गर्भपतन गराउने घटे
डोटी जिल्लामा सुरक्षित गर्भपतन गराउनेको संख्यामा घट्दै गएको छ । बिगत चार बर्षको तथ्याङ्क हेर्दा पछिल्लो बर्ष जिल्लामा सुरक्षित गर्भपतन गराउनेको संख्या घटेको पाइएको हो ।
स्वास्थ्य कार्यालय डोटीको तथ्याङ्क अनुसार आर्थिक बर्ष २०७५/०६६ मा सुरक्षित गर्भपतन गराउनेहरु एक हजार एक सय ४७ रहेका छन् । त्यसैगरी आर्थिक बर्ष २०७६/०७७ मा एक हजार ३१, आर्थिक बर्ष २०७७/०७८ मा एक हजार एक सय ११, र आर्थिक बर्ष २०७८/०७९ मा नौ सय २६ जनाले सुरक्षित गर्भपतनको सेवा लिएका छन् ।
सुरक्षित गर्भपतन गराउने मध्य २० बर्षमुनीका आर्थिक बर्ष २०७५/०६६ मा ७० जना, २०७६/०७७ मा ४९ जना, २०७७/०७८ मा ३५ जना र २०७८/०७९ मा ४० जना रहेको स्वास्थ्य कार्यालयका प्रमुख डिल्लीरमण जोशीले जानकारी दिए ।
परिवार नियोजन सेवाको उपलब्धता र प्रयोग बढ्दै गएकाले गर्भपतन गराउने महिलाको संख्यामा कमी आएको र पछिल्लो बर्षमा परिवार नियोजनको सेवा लिने बढ्नुका साथै गोपनियतालाई मध्यनजर गर्दै कसैले मेडिकलबाट औषधि किनेर पनि गर्भपतन गराएका कारण सुरक्षित गर्भपतन गराउने घटेका हुन सक्ने जोशीले बताए ।
