डोटी/डोटीमा कक्षा १२ का विद्यार्थीहरूलाई कोभिड–१९ विरुद्धको खोप लगाउन सुरु गरिएको छ । बडीकेदार गाउँपालिकाले आफ्नो क्षेत्रका विद्यालयमा कक्षा १२ अध्ययनरत विद्यार्थीहरूलाई पहिलो चरणमा कोभिड विरुद्धको खोप लगाउन सुरु गरेको हो ।
कोभिड संक्रमणका कारण लामो समयदेखि बन्द रहेका डोटीका विद्यालयहरू क्रमिक रूपमा खुल्न थालेपछि गाउँपालिकाले विद्यार्थीलाई खोप लगाएको हो ।गाउँपालिकाले वडा नम्बर २ मा रहेको बर्छैन माध्यमिक विद्यालय कक्षा १२ अध्ययनरत विद्यार्थीहरूलाई उक्त खोप लगाई पहिलो चरणको कार्यक्रमको सुरुवात गरेको गाउँपालिका स्वास्थ्य शाखा प्रमुख योगेन्द्र शाहीले जानकारी दिए ।
उक्त कार्यक्रममम कक्षा १२ अध्ययनरत ३६ छात्र र २९ छात्रालाई खोप लगाइएको उनले जानकारी दिए । जिल्लामा कक्ष १२ अध्ययनरत विद्यार्थीलाई कोभिड विरुद्धको खोपलगाउने बडीकेदार पहिलो पालिका रहेको गाउँपालिका अध्यक्ष कृष्णबहादुर चन्दको भनाइ छ । ‘कोभिड संक्रमण त्रासका कारण विद्यालय बन्द भएको लामो समयपछि पालिकाका विद्यालय खुलेको अवस्था छ । यस्तो अवस्थामा विद्यार्थीहरूलाई जोखिम नहोस भनेर हामीले खोप लगाउन सुरु गरेका हौं,’ उनले भने, ‘क्रमशः पुरै पालिकाका विद्यार्थीहरूलाई खोप लगाउने छौं ।’
