काठमाडौं/मंगलबार बिहान ११ बजेका लागि बोलाएको नेकपा एमाले स्थायी कमिटी बैठक सरेको छ। आवश्यक तयारी नपुगेको भन्दै बैठक दिउँसो ३ बजेका लागि सारिएको हो।
अध्यक्ष केपी शर्मा ओलीले एमालेका दोस्रो तहका नेताहरुसँग छलफल गर्न मंगलबार बिहान ११ बजेका लागि स्थायी कमिटी बैठक बोलाएका थिए। सोमबार बिहान माधवकुमार नेपाल नेतृत्वको नेकपा एकीकृत समाजवादी पार्टीमा नगएका र एमाले संस्थापनसँग पनि नरहेर बीचमा एकताकै पक्षमा उभिएका नेताहरु पार्टी अध्यक्ष ओली भेट्न बालकोट पुगेका थिए। ओलीसँगको भेटमा १० बुँदे सहमति कार्यान्वयन गर्ने सहमति भएको थियो।
उपाध्यक्षहरू भीम रावल, अष्ठलक्ष्मी शाक्य, युवराज ज्ञवाली, उपमहासचिव घनश्याम भुसाल, सचिवहरू भीम आचार्य, गोकर्ण विष्ट, योगेश भट्टराई, स्थायी समिति सदस्य सुरन्द्र पाण्डे, रघुजी पन्तलगायत नेताले पार्टी एकताको प्रयत्न जारी राख्ने बताएका छन्।
५७ केन्द्रीय सदस्य र सांसदको भेलाले १० बुँद्धे सहमति तत्काल कार्यान्वयनमा जोड दिँदै माधवकुमार नेपाललाई नयाँ पार्टी दर्ताबाट पछि हट्न आग्रह गरेको थियो। उनीहरुले एमाले नेतृत्वलाई सोमबारसम्मको अल्टिमेटम दिएका थिए।
