डोटी/डोटीको सदरमुकाम सिलगढीमा गाईजात्रा पर्व धुमधामका साथ मनाइएको छ । यहाँ बसोबास गर्ने नेवार समुदायले गाईजात्रा मनाए हुन् । आकर्षक झाँकीका साथ गाईको मूर्ति बनाइ बजार परिक्रमा गरेका थिए । परिक्रमापछि जिल्ला प्रशासनको परिसरमा विशेष पूजा पछि जात्रा समापन गरिएको थियो ।
यस बर्षमा नेवार समुदायका जुन घरमा मृत्यु भएका छन् सोही घरबाट गाईजात्रा निकालेको थियो ।
ऐतिहासिक प्रमाणअनुसार राजा प्रताप मल्लले छोराको मृत्युमा शोकविह्वल रानीको चित्त बुझाउन यस्तो परम्परा बसालेका हुन् ।
पुराणहरूमा गाईलाई लक्ष्मी, कामधेनु, गोमाता भनी आदर गरिएको छ । हिन्दुहरू गाईपालन र गौसेवा गर्न गौरवको अनुभव गर्छन् । गौदान हिन्दुहरूका महत्वपूर्ण संस्कृति पनि हो । पौराणिक नदी वैतरणी तर्न गाईको पुच्छर समातेर मात्र सकिन्छ । त्यसपछि मात्रै स्वर्ग पुगिन्छ भन्ने हिन्दुहरूमा जनविश्वास छ ।
