धनबहादुर बाेहरा
डाेटी, माघ- २७,
डाेटीकाे आदर्श गाउँपालिका वडा नम्बर ७ को नवनिर्मित वडा कार्यालय भवन औपचारिक रूपमा उद्घाटन गरिएको छ । सुविधा सम्पन्न उक्त भवन एक विशेष समारोहका बीच उद्घाटन गरिएको हो । नवनिर्मित भवनको उद्घाटन जिल्ला समन्वय समिति डोटीका प्रमुख लक्ष्मण सिंहले गरेका हुन् ।
उद्घाटन समारोहलाई सम्बोधन गर्दै समन्वय समिति प्रमुख सिंहले वडा कार्यालय भवन सेवा प्रवाहको मुख्य आधार भएको उल्लेख गर्दै भवन निर्माणले सेवाग्राहीलाई सहज, प्रभावकारी र छरितो सेवा दिन महत्वपूर्ण टेवा पुग्ने बताए । उनले अब नयाँ भवनबाट वडा कार्यालयले नागरिकलाई अझ व्यवस्थित र सहज रूपमा सेवा प्रदान गर्न सक्ने विश्वास व्यक्त गरे ।
वडा अध्यक्ष लाल बहादुर बिष्टले यसअघि सुविधा सम्पन्न भवनको अभावमा सेवा प्रवाहमा विभिन्न समस्या आइरहेको स्मरण गर्दै नयाँ भवन निर्माण भएसँगै ती समस्या समाधान हुने बताए । उनले साँघुरो र चुहिने पुरानो भवनबाट सेवा दिनु पर्दा कर्मचारी तथा सेवाग्राही दुवैलाई असहज भएको भन्दै अब नयाँ भवनबाट सेवा प्रवाह थप चुस्त, दुरुस्त र प्रभावकारी हुने विश्वास व्यक्त गरे ।
त्यस्तै, वडा सचिव जग्दिश नेपालीले गुणस्तरीय सेवा प्रवाह गर्ने उद्देश्यअनुसार वडा कार्यालयको आफ्नै भवन निर्माण गरिएको जानकारी दिए । उनले सुविधा सम्पन्न भवनको पूर्ण सदुपयोग गर्दै कर्मचारीहरूले आम नागरिकलाई छिटो, सहज र पारदर्शी सेवा दिनुपर्नेमा जोड दिए । आफ्नै भवन निर्माण हुन पाउँदा खुशी व्यक्त गर्दै उनले अब वडावासीहरूले सेवा लिन आउँदा विभिन्न कठिनाइ तथा असुविधा भोग्न नपर्ने बताए ।
वडा कार्यालयको नवनिर्मित भवन ९५ लाख रूपैया लगानीमा निर्माण गरिएको हो । उद्घाटन कार्यक्रममा स्थानीय जनप्रतिनिधि, कर्मचारी, समाजसेवी तथा वडावासीहरूको उल्लेखनीय उपस्थिति रहेको थियो।
