बन्दना बम
डोटी, माघ– ६,
आसन्न फागुन २१ गते हुने प्रतिनिधि सभा सदस्य निर्वाचनको लागि डोटीबाट नौ वटा राजनितिक दलहरुले उम्मेदवारी मनोनयन दर्ता गरेका छन् ।
उम्मेदवारी दर्ता गर्ने दलहरुमा नेपाली कांग्रेसबाट प्रतिनिधि सभा सदस्यबाट भरत बहादुर खड्काले उम्मेदवारी दर्ता गरेका छन् । खड्का २०७० सालमा समानुपातिक सांसद हुन भने २०७४ मा प्रदेश क्षेत्र नम्बर क बाट निर्वाचित प्रदेश सभा सदस्य हुन् ।
नेकपा एमालेबाट दीपक धामीले उम्मेदवार दर्ता गरेका छन् । धामी हाल एमाले निकट अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) का केन्द्रीय अध्यक्ष हुन् ।
त्यसैगरी नेपाली कम्युनिष्ट पार्टी (नेकपा)बाट त्रिलोचन भट्टले उम्मेदवारी दर्ता गराएका छन् । नेकपाको केन्द्रीय सदस्य रहेका भट्ट २०७४ सालको निर्वाचनमा नेकपा (माओवादी केन्द्र) बाट डोटी प्रदेश क्षेत्र ‘ख’ बाट निर्वाचित भएका थिए भने उनी पाँच वर्षसम्म सुदूरपश्चिम प्रदेशको मुख्यमन्त्री भएका थिए ।
राष्ट्रिय स्वतन्त्र पार्टी (रास्वपा) बाट नरेन्द्र बहादुर खड्काले उम्मेदवारी दिएका छन् । खड्का २०७९ सालको प्रतिनिधि सभा सदस्य निर्वाचनामा स्वतन्त्र उम्मेदवारका रूपमा निर्वाचन लडि पराजित भएका थिए । उनी व्यवसायिक पृष्ठभूमीका हुन् । डोटी उद्योग वाणिज्य संघका पूर्व अध्यक्ष समेत रहिसकेका छन् ।
राष्ट्रिय जनमोर्चाबाट मनोज भट्टले उम्मेदवारी दर्ता गराएका छन् । भट्ट राष्ट्रिय जनमोर्चाका केन्द्रीय महासचिव हुन् ।
राष्ट्रिय प्रजातन्त्र पार्टी (राप्रपा) बाट खडग अग्रवालले प्रतिनिधि सभा सदस्यको उम्मेदवार दर्ता गराएका छन् ।
त्यसैगरी नेपाल मजदुर किसान पार्टीबाट खगेन्द्र बहादुर शाहीले उम्मेदवारी दर्ता गरेका छन् । डोटी जिल्लामा नेमकिपाको संगठन शुन्य जस्तै भएकाले शाही उम्मेदवारका लागि लम्किचुहा नपा ४, कैलालीबाट आएका हुन । उनी नेमकिपाको केन्द्रीय सदस्य रहेका छन् ।
नेकपा (माओवादी)बाट प्रकाश कठायतले उम्मेदवारी दर्ता गराएका छन् ।
डोटीमा नयाँ पार्टीको रुपमा मितेरी पार्टी नेपालले समेत आफ्नो उम्मेदवारी मनोनयन दर्ता गरेको छ । उक्त पार्टीबाट सरस्वती मल्ल पालले उम्मेदवारी दर्ता गराएकी हुन् ।
उम्मेदवारी मनोनयन दर्ता गर्दै डोटीका अधिकांश उम्मेदवारहरुले डोटीको समग्र विकास तथा जेनजी उमेर समुहले उठाएका मुद्दाहरुलाई संस्थागत गर्न लागने बताएका छन् ।
