धन बहादुर बोहरा,
सिलगढी : निर्वाचन आयोगले गत असोज १० गतेदेखि १६ वर्ष पुगेका नेपाली नागरिकता प्राप्त व्यक्तिले मतदाता नामावलीमा नाम दर्ता गर्न आह्वान गरेपछि निर्वाचन कार्यालय डोटीमा एक हजार आठ सय ६२ जना नयाँ मतदाता थपिएका छन् ।
अगामी फागुन २१ गते हुने प्रतिनिधिसभा सदस्यको निर्वाचनका लागि मतदाता परिचयपत्र बनाउन निर्वाचन आयोगले असोज १० गते मंसिर ५ गतेसम्म मतदान नामावली संकलन आवेदन आह्वान गरेपछि डोटीमा सो संख्यामा मतदाता थपिएका हुन्।
निर्वाचन कार्यालय डोटीले दिएको जानकारी अनुसार कार्यालयमै उपस्थित भएर पाँच सय ८३ जनाले र अनलाइन प्रणालीबाट विवरण भरेर एक हजार दुई सय ७९ जना गरी जम्मा एक हजार आठ सय ६२ जनाले मतदाता नामावलीमा नाम दर्ता गराएका हुन्।
एक हजार आठ सय ६२ मतदाता थपिएसँगै डोटी जिल्लामा कुल मतदाताको संख्या एक लाख २९ हजार ९ सय ६३ पुगेको छ। जसमा महिलाको संख्या ६७ हजार पाँच सय २६ र पुरुषको संख्या ६२ हजार चार सय ३७ जना रहेको कार्यालय प्रमुख करुणाकर पन्तले जानकारी दिए।
मतदाता नामावली दर्तासँगै त्रुटि सच्याउने र मतदाता केन्द्र परिवर्तन गर्ने कार्य समेत भइरहेको उनले बताए। पहाडी जिल्लाबाट बसाइसराइ गर्नेको संख्या बढिरहेको अवस्थामा यो संख्यामा मतदाता थपिनु उत्साहजनक रहेको उनको भनाई छ।
