असोज– ३१, डोटी,
सिलगढी खानेपानी उपभोक्ता तथा सरसफाइ समिति डोटीले समुदायस्तरिय अभिमुखिकरण कार्यक्रम सम्पन्न गरेको छ । दिपायल सिलगढी नगरपालिका वडा नम्बर ७ पाकरीमा शुक्रबार कार्यक्रमको आयोजना गरेको हो ।
उपभोक्ताहरुको सहभागिता तथा समितिका अध्यक्ष जगत बहादुर खड्काको सभापतित्वमा सम्पन्न कार्यक्रममा वडाअध्यक्ष कर्ण बहादुर बिष्ट प्रमुख अतिथि रहेका थिए । कार्यक्रममा बोल्दै वडाअध्यक्ष एवं प्रमुख अतिथि बिष्टले खानेपानी समान ढंगले वितरण हुने र यसका लागि उपभोक्ताहरुले पनि समितिलाई सहयोग गर्नुपर्ने बताए ।
उनले पानी सफा राख्न मुहानको सरसफाइ तथा स्रोत संरक्षण गर्नुपर्ने बताए ।व्यक्तिगत सरसफाइमा समेत सबैले चासो राख्नुपर्ने बिष्टले बताए । उनले एउटा समुदायमा एउटा हेल्पलाइनको समेत व्यवस्था हुनुपर्ने समितिलाई आग्रह गरे ।
कार्यक्रममा बोल्दै समितिका अध्यक्ष खड्काले सबै उपभोक्ताको सहयोगले नियमित खानेपानी संचालनमा सहजता आउने र केहि समय भित्रै सबै ठाउँ एक घर एक धाराको अवधारण अनुसार नयाँ ढंगबाट पानी संचालन हुने बताए । हाल उपभोक्तालाई भइरहेका समस्या समाधानका लागि आफुहरु आजैदेखि लाग्ने अध्यक्ष खड्काले जानकारी गराए ।
कार्यक्रममा समितिका सदस्य देबेन्द्र गुरुङ्गले खानेपानी, सरसफाइ तथा स्वच्छता सम्बन्धि जानकारी गराएका थिए भने समितिका सदस्यहरुले हात धुने चरणहरुको डेमो देखाएका थिए ।
कार्यक्रममा उपस्थित सम्पूर्ण उपभोक्ताहरुलाई लुगाधुने तथा नुहाउने साबुन वितरण गरिएको थियो । त्यसैगरी कार्यक्रममा ट्याङ्की निर्माणका लागि जग्गा दिने व्यक्तिहरु बाटुदेवी बिष्ट र गोल्मादेवी दमाईलाई सम्मान गरिएको थियो ।
