डोटी, असार १२ गते,
सिलगढी/डोटी जिल्लालाई पूर्णखोप सुनिश्चितता तथा दिगोपना जिल्ला घोषणा गरिएको छ । ‘स्थानीय स्वामित्व र सहभागिता, पूर्णखोप सुनिश्चितता हाम्रो प्रतिबद्धता’ भन्ने मूल नाराका साथ डोटी जिल्लालाई बिहिबार पूर्ण खोप सुनिश्चितता तथा दिगोपना जिल्ला घोषणा गरिएको हो । सुदूरपश्चिम प्रदेशको पहिलो जिल्लाका रुपमा डोटीलाई पूर्णखोप सुनिश्चितता तथा दिगोपना घोषणा गरिएको छ ।
पूर्ण खोप समन्वय समितिका संयोजक एवं जिल्ला समन्वय समितिका प्रमुख लक्ष्मण बहादुर सिंहले सिलगढीमा आयोजित एक समारोहका बीच पूर्णखोप सुनिश्चिता तथा दिगोपना जिल्ला घोषणा गरेका हुन् ।
खोप लगाउने उमेर समूहका सबै बालबालिकाले खोप लगाएको सुनिश्चित भएपछि जिल्लाका नौ वटै पालिकालाई यसअघिनै पूर्णखोप सुनिश्चितता तथा दिगोपना घोषणा गरिएको स्वास्थ्य कार्यालय डोटीका प्रमुख रमेश मलासीले बताए । जिल्लाका नियमित खोप लगाउने जन्मेदेखि १५ महिना सम्मका ३ हजार ४ सय ५३ बालबालिकाहरुलाई पूर्ण रूपमा नियमित खोप लगाए पछि जिल्लालाई पूर्णखोप सुनिश्चित तथा दिगोपना घोषणा गरिएको मलासीले बताए ।
जिल्लामा १६ देखि ५९ महिनासम्मका बालबालिकाको संख्या १० हजार ४ सय १५ जना रहेको छ । त्यसमध्ये खोपको शून्य डोज लगाउन छुटेका ६ जना र आंशिक खोप लगाउन छुटेका एक सय १२ जना बालबालिकाहरुको खोजि गरेर खोप लगाइएको स्वाथ्य कार्यालय डोटीका खोप संयोजक डिल्लीरमण जोशीले बताए ।
राष्ट्रिय खोप तालिकाअनुसार जन्मेदेखि १५ महिनासम्मका बालबालिकालाई १४ वटा रोग विरुद्ध १३ किसिमका खोप प्रदान गरिन्छ । जिल्लाका बालबालिकाहरूले यी सबै खोपहरु पूर्णमात्रामा पाएको सुनिश्चित भएपछि पूर्ण खोप सुनिश्चित तथा दिगोपना जिल्ला घोषणा गरिएको बताइएको छ ।
डोटी जिल्लालाई पहिलो पटक २०७५ साल जेठ १९ गतेका दिन पूर्णखोप सुनिश्चितता तथा दिगोपना जिल्ला घोषणा गरिएको थियो । राष्ट्रिय खोप तालिकाअनुसार खोप पाए नपाएको अनुगमन र घरधुरी सर्वेक्षण गरेपछि जिल्लाका नौवटै स्थानीय तहलाई पूर्णखोप सुनिश्चितता तथा दिगोपना घोषणा गरेर जिल्लालाई घोषणा गरिएको जिल्ला पूर्णखोप समन्वय समितिका संयोजक सिंहले बताए ।
घोषणा कार्यक्रममा जिल्ला स्थित स्थानीय तहका प्रमुख, स्वाथ्यकर्मी, सञ्चारकर्मी लगायतको सहभागिता रहेको थियो ।
