डोटी, चैत– १८,
डोटीमा चलिरहेको बोलेरो जीपबाट खसेर एक जनाको मृत्यु भएको छ ।
सोमबार बेलुकी करिब ६ बजेको समयमा दिपायलबाट आदर्श गाउँपालिका तर्फ जाँदै गरेको सुदूरपश्चिम प्रदेश ०१००१ च ४११८ नम्बरको बोलेरो जीपको पछाडीको ढालामा बसिरहेका आदर्श गाउँपालिका– २ कुचेडाका गाडी साहु बर्ष ३४ का ज्ञानेन्द्र बहादुर बोहराको ढालाबाट खस्दा मृत्यु भएको जिल्ला प्रहरी कार्यालयले जानकारी दिएको छ ।
जीपबाट खस्दा उनलाई तत्कालै उपचारको लागि दिपायल स्थित शैलेश्वरी अस्पतालमा ल्याइएको र उपचारको क्रममा डाक्टरले मृत घोषणा गरेको प्रहरीले जनाएको छ ।
जीपबाट खस्दा उनको छाती र टाउकोमा चोट लागेको थियो । आदर्श गाउँपालिका– ३, नुवाकोट बस्ने बर्ष २३ का गाडी चालक विराज भट्ट र गाडीलाई प्रहरीले नियन्त्रणमा लिएको जिल्ला प्रहरी कार्यालयका सूचना अधिकारी प्रहरी उपरीक्षक भिमलाल भट्टराईले जानकारी दिएका छन् ।
