बन्दना बम,
डोटी, चैत– ५,
चैत ७ गते (बिहीबार) देखि सुरु हुने माध्यमिक शिक्षा परीक्षा (एसईई) मा डोटीबाट चार हजार ६२ जना परीक्षार्थीहरु सहभागी हुने भएका छन् ।
शिक्षा विकास निर्देशनालय दिपायलले दिएको जानकारी अनुसार दुई हजार २ सय २२ जना छात्रा र एक हजार ८ सय ४० जना छात्र यस बर्षको एसईई परीक्षामा सहभागी हुने भएका छन् । जसमा तीन सय ८२ जनाको संख्यामा छात्रा बढी रहेका छन् ।
जसमा नियमितमा साधारण तर्फ एक हजार ४०७ जना छात्र र एक हजार ५२० छात्रा गरी जम्मा २ हजार नौ सय २७ जना विद्यार्थी सहभागी हँदैछन् । त्यसैगरी नियमितमा प्राबिधिक तर्फ ६३ छात्र र ५५ छात्रा गरी एक सय १८ जना विद्यार्थी रहेका छन् ।
त्यस्तै डोटीमा ग्रेडवृद्धि तर्फ तीन सय ७० छात्र र छ सय ४७ छात्रा गरी जम्मा १ हजार १७ जना परीक्षार्थीहरु एसईईमा सहभागी हुँदैछन् ।
गत वर्षको तुलनामा डोटीबाट एसईई दिने विद्यार्थीको संख्यामा आठ सय ४५ ले वृद्धि भएको छ । गत वर्ष तीन हजार २१७ जना विद्यार्थीहरु एसईईमा सहभागी रहेका थिए ।
डोटीमा एसईई परीक्षाको तयारी पुरा भइसकेको शिक्षा विकास तथा समन्वय इकाई डोटीका प्रमुख भिम प्रसाद पनेरुले जानकारी दिएका छन् । यस बर्ष डोटीमा जम्मा १५ वटा परीक्षा केन्द्र तोकिएको पनेरुले बताए ।
सुदूरपश्चिममा ५८ हजार ९ सय ४३ जना परीक्षार्थी एसईईमा सहभागी हुँदै
यस वर्ष सुदूरपश्चिम प्रदेशबाट २८ हजार ६६ जना छात्र र ३० हजार आठ सय ७७ जना छात्रा गरी जम्मा ५८ हजार नौ सय ४३ जना विद्यार्थीहरु एसईईमा सहभागी हुने भएका छन् ।
शिक्षा विकास निर्देशनालय दिपायलले दिएको जानकारी अनुसार कैलाली जिल्लामा नौ हजार दुई सय ७२ छात्र र १० हजार दुई सय १६ छात्रा गरी जम्मा १९ हजार चार सय ८८ जना परीक्षार्थी रहेका छन् भने कञ्चनपुरमा पाँच हजार तीन सय ७७ छात्र र पाँच हजार नौ सय २५ छात्रा गरी जम्मा ११ हजार तीन सय एक परीक्षार्थी रहेका छन् ।
त्यसैगरी डडेल्धुरा जिल्लामा एक हजार तीन सय ३७ छात्र र एक हजार चार सय ६५ छात्रा गरी जम्मा दुई हजार आठ सय दुई विद्यार्थी रहेका छन् । डोटीमा एक हजार ८ सय ४० जना छात्र र दुई हजार २ सय २२ जना छात्रा गरी जम्मा चार हजार ६२ जना परीक्षार्थीहरु रहेका छन् ।
अछाममा दुई हजार तीन सय ७१ छात्र र दुई हजार ५ सय ५८ छात्रा गरी जम्मा पाँच हजार २९ विद्यार्थीहरु सहभागी छन् भने बाजुरामा एक हजार चार सय ५५ छात्र र एक हजार पाँच सय ६३ छात्रा गरी जम्मा तीन हजार १८ जना परीक्षार्थी सहभागी रहेका छन् ।
त्यस्तै बझाङ्गमा दुई हजार दुई सय ५४ छात्र र दुई तीन सय ९० छात्रा गरी जम्मा चार हजार ५ सय ४४ परीक्षार्थी रहेका छन् भने बैतडीमा दुई हजार पाँच सय ६५ छात्र र दुई सात सय ९७ छात्रा गरी जम्मा पाँच हजार तीन सय ६२ विद्यार्थी रहेका छन् । दार्चुलामा भने एक हजार पाँच सय ९५ छात्र र एक हजार ५ सय ४२ छात्रा गरी जम्मा तीन हजार दुई सय ३७ परीक्षार्थी सहभागी हुने शिक्षा विकास निर्देशनालय दिपायलले जानकारी दिएको छ ।
