डोटी/के.आई.सिंह गाउँपालिका स्वास्थ्य शाखाको आयोजनामा सोमबार वडा नम्बर ५ को रानागाउँ स्वास्थ्य चौकीमा महिलाहरुका लागि एकिकृत निःशुल्क घुम्ति शिबिर संचालन गरिएको छ ।
प्रजनन् स्वास्थ्य रुग्णताको स्कृनिङ्ग तथा व्यवस्थापन सम्बन्धि शिबिरमा पाठेघर खसेका महिलाहरुको उपचार तथा स्क्रीनिङ्ग, पाठेघरको मुखको सम्भावित क्यान्सर सम्बन्धि जाँच, यौन रोगको उपचार तथा परामर्श सेवा, परिवार नियोजनको लामो अवधिको अस्थायी साधन राख्ने सेवा लगायतका सेवा उपलब्ध गरिएको स्वास्थ्य शाखा प्रमुख नविन माँझिले जानकारी दिनु भएको छ ।
शिबिरमा ५० जना महिलाहरुले सेवा लिएका छन् । जसमा २४ जनाको पाठेघरको मुखको सम्भावित क्यान्सर सम्बन्धि जाँच गरिएको थियो । त्यसमा ३ जनामा सम्भावित क्यान्सर हुने देखिएको र उनिहरुको थप उपचारका लागि बाहिर लैजानु पर्ने देखिएको स्वास्थ्य शाखा प्रमुख माँझिले बताउनु भयो ।
शिबिरमा एम.बि.बि.एस. डाक्टरद्वारा सामान्य चेकजाँच समेत गरिएको र सो चेकजाँचमा ६५ जनाले सेवा लिएको रानागाउँ स्वास्थ्य चौकी इन्चार्ज रमेश जोशीले जानकारी दिनु भयो ।
त्यसैगरी आइतबार वडा नम्बर ६ र ७ का महिलाहरुका लागि भुमिराजमाण्डौंमा शिबिर संचालन गरिएको बताइएको छ । सो शिबिरमा ३३ जनाले सेवा लिएका थिए । जसमा ४ जनाको सम्भावित क्यान्सर हुने देखिएको माँझिले बताउनु भयो । शिबिर सबै वडाहरुमा संचालन हुने बताइएको छ ।
