भुमिराजमाण्डाैं/केआईसिंह गाउँपालिका वडा नम्बर ७ मा मंगलबार एक कार्यक्रमका बिच झाेलुङ्गे पुलको उद्घाटन गरिएको छ । केआईसिंह गाउँपालिका वडा नम्बर ७ भुमिराजमाण्डाैं र शिखर नगरपालिका वडा नम्बर १ कपल्लेकी जोड्ने उक्त पुलको उद्घाटन गाउँपालिकाका अध्यक्ष लोकेन्द्रबहादुर शाहीले गर्नु भएको छ ।
सलेनिगाडमा रहेको पुलको लम्बाई एक सय १८ मिटर रहेको वडा अध्यक्ष दिलबहादुर बलायरले जानकारी दिनु भयो । जम्मा रकम रु. ६३ लाख ३७ हजार आठ सय १७ लागतमा सम्पन्न भएको कार्की सेरा दुनुरे झाेलुङ्गे पुल निर्माण आयोजनामा केआईसिंह गाउँपालिका, केदार ग्रामिण विकास समाज नेपाल, हेल्बटास लगायतको प्राविधिक तथा आर्थिक सहयोग रहेको बताइएको छ ।
पुलको उद्घाटन गर्दै पालिकाका अध्यक्ष शाहीले पुलले स्थानीयबासीहरुलाई आवतजावत गर्न सहज हुने र सबैको सहयोगमा विकास निर्माण कार्य सम्भव रहेकाले सबैको हातेमालोबाट अगाडि बढ्न सकिने बताउनु भयो ।
पुलबाट जम्मा एक सय १२ घरधुरी लाभान्वित हुने बताइएकाे छ । पुलकाे शिलान्यास तत्कालिन वडा अध्यक्ष हर्क बहादुर बिष्टकाे पालामा २०७८ फागुन १६ गते भएकाे थियाे ।
