धनबहादुर बोहरा
डोटी, चैत ११
आजपनि डोटीमा माटो खन्ने क्रममा एक महिलाको मृत्यु भएको छ । शनिवार भएको घटना सेलाउन नपाउँदै घर पोत्ने माटो खन्ने क्रममा आईतवार थप एक महिलाको मृत्यु भएको छ ।
जिल्ला प्रहरी कार्यालय डोटीका सूचना अधिकारी प्रहरी नायव उपरीक्षक निशान्त श्रीवास्तवका अनुसार आज दिउँसो करिब ३ बजेतिर माटो खन्ने क्रममा पुरिएर आदर्श गाउँपालिका–२ कुचेडाकी ६० वर्षीय भागादेवी ओझाको मृत्यु भएको हो ।
माटो खन्ने क्रममा माटोको ढिस्कोमा पुरिंदा ओझाको मृत्यु भएको हो । उहाँसँगै माटोमा पुरिनुभएकी ५० वर्षीय पार्वती खड्काको भने उद्धार गरिएको प्रहरीले जनाएको छ । घाइतेको जिल्ला अस्पताल डोटीमा उपचार भइरहेको छ ।
हिजो शनिवार माटो खन्ने क्रममा शिखर नगरपालिका–९ की २१ वर्षीय निर्मला रोस्याराको मृत्यु भएको थियो । नयाँ वर्ष नजिकिएसँगै घर पोत्नका लागि रातो तथा कमेरो माटो खन्ने क्रम बढ्दा यस्ता घटना हुन थालेका छन् ।
