दिपायल/डोटीमा एकल महिलालाई अटोरिक्सा हस्तान्तरण गरिएको छ । बुधबार एक कार्यक्रममा दिपायल सिलगढी नगरपालिकाका प्रमुख बाजी सिं खड्काले अटोरिक्सा हस्तान्तरण गरेका हुन् ।
जिविकोपार्जनमा सहयोग पुगोस् भन्ने उद्देश्यले एकल महिलालाई अटो हस्तान्तरण गरिएको आयोजक संस्था सम विकास केन्द्र (इडिसी) डोटीले जानकारी दिएको छ । दिपायल सिलगढी नगरपालिकाको २ लाख तथा सम विकास केन्द्र र एक्सन एड नेपालले ४ लाख लगानी गरी अटोरिक्सा हस्तान्तरण गरिएको हो । दिपायल सिलगढी नगरपालिका वडा नम्बर ७ घर भइ बिगत १४ बर्षदेखि माइतीघर राजपुरमा बस्दै आएकी धनसरा आउजीलाई अटो हस्तान्तरण गरिएको हो ।
अटो हस्तान्तरण पूर्व सम विकास केन्द्र (इडिसी) डोटीको आयोजनामा जिल्लाको मुख्य व्यापारीक केन्द्र दिपायलमा ‘समतामूलक समाजको निर्माण, हाम्रो अभियान’ भन्ने मुल नाराकासाथ समान कामको समान ज्याला र श्रम अधिकार सम्बन्धी बजारमा दबाबमूलक ¥याली निकालिएको थियो ।
बिहीबार शिखर नगरपालिकामा पनि थप अर्को अटो शिखर नगरपालिकासंगको सहकार्यमा हस्तान्तरण गर्ने योजना रहेको सम विकास केन्द्र इडिसीका अध्यक्ष केशव परियारले बताए ।
१३ बर्षअघि श्रीमान गुमाउँदा धनसरादेवी नेपाली ज्यालामजदुरी गरेर चार सन्तानको पालन पोषण गर्दै आएकी थिइन् । न्यून ज्यालामजदुरी र कामको अभावमा जीवन गुजार्न नै संघर्ष भइरहेका बेला सवारी चालकको तालिम देखि अटोरिक्सा नै प्रदान गरेकोमा धनसरादेवीले खुसी व्यक्त गरिन ।
माइतमा आएर ४ सन्तान र जन्मदिने आमाको स्याहार गर्दै धनसरादेवीले ६ लाख मुल्य बराबरको अटोबाट प्राप्त आम्दानीले जीवनशैली नै फेरिने योजना सुनाइन् । सम विकास केन्द्रले भागादेवी सहित ७ जना महिलालाई अटो सवारी चालक अनुमतीका लागि एक महिने तालिम समेत संचालन गरेको जनाएको छ ।
नगर प्रमुख खड्काले अटोले भागादेवीलाई मात्र प्रेरणा नभइ अन्य महिलाहरुका लागि समेत सन्देश रहेको सुनाए । महिलाले पनि पुरुषसरह काम गर्न सक्छन् भन्ने सन्देश दिन नगरपालिका र इडिसीले अटोमा लगानी गरेको बताए ।
