खगेन्द्र सिंह,
डोटी/करदाता सेवा कार्यालय डोटीले नियमित रुपमा बजार अनुगमन गर्नुका साथै व्यापारीहरुलाई कर शिक्षा समेत दिइरहेको छ ।
राजश्व छलि रोक्न तथा करको दायरा भन्दा बाहिर रहेका व्याबसायीहरुलाई करको दायरामा ल्याउन नियमित रुपमा बजार अनुगमन गर्न थालिएको करदाता सेवा कार्यालय, डोटीका कर अधिकृत अमर थापाले जानकारी दिए । साथै साना व्यापारीहरुलाई करको बिषयमा ज्ञान नहुने भएकाले कर शिक्षा समेत दिन थालिएको थापाले बताए ।
बुधबार आदर्श गाउँपालिका विभिन्न स्थान र सायल गाउँपालिकाको मेल्लेक बजारको अनुगमन गरिएको थियो । बजार अनुगमनको क्रममा विभिन्न पसलहरुबाट स्टिकर नभएको २५० पोका भन्दा बढी इन्डियन आन्टी, १५० पोका भन्दा बढी सुपर पावर केही थान इन्डियन बिडि बरामद गरेको बताइएको छ ।
आन्तरिक राजस्व विभागको परिपत्र अनुसार करदाता सेवा कार्यालय डोटीले दैनिक रुपमा बजार अनुगमन गरिरहेको हो । आगामी दिनमा समेत जिल्लाका सबै स्थानीय तहमा निरन्तर बजार अनुगमन हुने करदाता सेवा कार्यालयका कर अधिकृत थापाले जानकारी दिए ।
