धनबहादुर बोहरा
डोटी/खप्तड शैलेश्वरी हाई अल्टिच्युड म्याराथनमा पुरुषतर्फ त्रिभुवन आर्मी क्लबका खडक बहादुर खड्का प्रथम भएका छन् । ०२५ नम्बर जर्सिका खड्काले निर्धारित दुरी ४२ किलोमिटर २ घण्टा ३७ मिनेट ४६ सेकेन्डमा पार गरेर प्रथम भएका हुन् । खप्तडको ३ हजार ३ सय फिट अग्लो उचाइबाट सुरु भएको म्याराथन डोटीको सिलगढी स्थित शैलेश्वरी टुडिखेलसम्म रहेको थियो ।
प्रथम भएका खड्काले नगद एक लाख २५ हजार प्राप्त गरे । पदमार्गमा भएको म्याराथनमा पहिलोपटक सहभागि जाजरकोट घर भएका खड्का विभिन्न म्याराथनमा सहभागि भएपनि उकालो ओरालो भएको पदमार्गमा आयोजित म्याराथनमा प्रथम हुँदा आत्मबल बढेको भन्दै खुसी व्यक्त गरे ।
त्यस्तै त्रिभुवन आर्मी क्लबकै नरेन्द्र सिं रावत दोस्रो भएका छन् । २ घण्टा ३९ मिनेट ३४ सेकेन्डमा निर्धारित दूरी पार गर्दै दोस्रो भएका ०२७ नम्बर जर्सिका रावतले ८० हजार नगद पुरस्कार जिते । बैतडी घर भएका रावतले यस अघिका विभिन्न म्याराथनमा गोल्डमेडल प्राप्त गरेका थिए । उनले उकालोमा प्रतिस्पर्धीलाई पछाडि पारेका भएपनि ओरालोमा भने खड्का भन्दा पछि परेका बताए ।
तेस्रो भने जुम्लाका कर्णाली स्पोर्ट्स क्लबका बिरेन्द्र पाण्डेय भए । उनले २ घण्टा ४२ मिनेट ४४ सेकेन्डमा दूरी पार गरेका थिए । तेस्रोलाई भने ५० हजार पुरस्कार रहेको थियो । ०३६ नम्बर जर्सीका पाण्डेयले विभागीय खेलाडीसँग प्रतिस्पर्धा गरेर तेस्रो स्थान प्राप्त गरेपनि आफू सन्तुष्ट रहेको बताए । म्याराथनमा सहभागि हुन लागेको ५ महिनामै कठिन बाटोमा पनि तेस्रो स्थान सुनिश्चित गरेको पाण्डेको प्रतिकृया थियो ।
डोटी उद्योग वाणिज्य संघ र सुदूरपश्चिम खेलकुद परिषदको आयोजना तथा नेपाली सेनाको भैरव प्रसाद गण सिलगढी, श्री नम्बर ५ बाहिनी अड्डा र सिंह शार्दुल गुल्म खप्तड ब्यारेकको व्यवस्थापनमा आयोजित खप्तड शैलेश्वरी म्याराथनमा स्वदेशी तथा बिदेशी गरी ४८ जना धावक सहभागि रहेका थिए । खप्तडको प्रचार प्रसार गर्ने उद्देश्यले म्याराथनको आयोजना गरिएको उद्योग वाणिज्य संघका अध्यक्ष मोहन कलेलले बताए । गतवर्ष पनि खप्तडमा लाग्ने गङ्गा दशहरा मेलाको अवसर पारेर म्याराथन प्रतियोगिताको आयोजना गरिएको थियो ।
महिलातर्फको हाफ म्याराथनमा पूर्ण लक्ष्मी प्रथम
महिलातर्फको हाफ म्याराथनमा भने त्रिभुवन आर्मीकी पूर्ण लक्ष्मी न्यौपाने प्रथम भएकी छिन् । न्यौपानेले १ घण्टा १४ मिनेट १८ सेकेन्डमा निर्धारित दूरी २१.५ किलोमिटर पार गर्दै नगद ५० हजार जित हासिल गरिन् । त्यस्तै नेपाल पुलिस क्लबकी रेखा बिष्टले १ घण्टा २२ मिनेट १० सेकेन्डमा दुरी पार गर्दै दोस्रो भइन् । डोटी घर भएकी बिष्टले भने नगद ३० हजार प्राप्त गरिन् ।
त्यस्तै तेस्रो स्थानमा भने भैरब प्रसाद गण सिलगढीकी सुन्तली कडायत भएकी छन् । अछाम घर भएकी उनले एक घण्टा २६ मिनेट ८ सेकेन्डमा दूरी पुरा गरेकी थिइन् । कडायतले २० हजार नगद प्राप्त गरिन् ।
जेठ १६ गते खप्तड क्षेत्रमा लागेको गंगा दशहरा मेलाको अवसरमा १२ गतेदेखि १७ गतेसम्म हाई अल्टिच्युड म्याराथन प्रतियोगिता लगायत भलिबल प्रतियोगिता, घोडा दौड प्रतियोगिता र देउडा प्रतियोगिताको आयोजना गरिएको थियो ।
