सिलगढी/डोटीमा टिपर दुर्घटना हुँदा एकजना चालक घाईते भएका छन् । शनिबार साँझ करिब ८ बजेतिर शिखर नगरपालिका वडा नम्बर १ मा पर्ने समुहगाडमा से १ प १४४० नम्बरको टिपर दुर्घटना भएको हो ।
दुर्घटनामा परी घाईते भएका टिपर चालकलाई सुदूरपश्चिम प्रदेशका मुख्यमन्त्री कमलबहादुर शाहले आफु सवार गाडीमा राखेर दिपायल स्थित शैलेश्वरी अस्पतालमा उपचारका लागि ल्याइएको नेपाली कांग्रेसका महाधिबेशन प्रतिनिधी पुष्प कुमार शाहीले जानकारी दिए । मुख्यमन्त्री शाह धनगढीबाट दिपायल आउँदै गरेका थिए ।
दुर्घटनामा चालक बुद्ध लामा घाईते भएका र सहचालक सकुसल रहेको ईलाका प्रहरी कार्यालय दिपायलका असई भक्त खड्काले जानकारी दिए । घाईते चालकको अवस्था सामान्य रहेको अस्पताल स्रोतले जनाएको छ । दिपायल तर्फ आउँदै गरेको टिपर सडकमै पल्टिएको थियो ।
