डोटी/एचआईभी/एड्सको क्षेत्रमा काम गर्दै आईरहेको ए.एच.एफ.नेपाल परियोजनाले डोटीमा पनि कामलाई निरन्तरता दिने भएको छ । डोटीमा समेत एचआईभी/एड्सको क्षेत्रमा हालसम्म गर्दै आईरहेको कामलाई निरन्तरता दिने भएको हो ।
सरोकारवालासंग सिलगढीमा शुक्रबार आयोजित अन्तरक्रिया कार्यक्रममा परियोजनाका बिषयमा बोल्दै ए.एच.एफ.नेपालका सुदूरपश्चिम प्रदेश संयोजक माधबराज पन्तले परियोजनाले सहयोग गरेका एआरटी केन्द्रहरुमा गुणस्तरीय उपचार, हेरचाह तथा सेवाको पहुँचमा बढोत्तरी गर्ने उद्देश्य रहेको बताए ।
‘थप गुणस्तरीय एआरटी सेवाहरु बनाउन समन्वय, सञ्जालीकरण र एडभोकेसीलाई बनाइने छ ।’, पन्तले भने, ‘मुख्य लक्षित समुदाय केन्द्रित एचआईभी रोकथाम, जाँच तथा लिकेज सेवाहरुमा सुधार तथा विस्तार गर्ने उद्देश्य रहेको छ ।’
नेपाल सरकारलाई दिगो विकास लक्ष्य र राष्ट्रिय एचआईभी रणनीति योजना सन् २०२१-२०२६ ले परिकल्पना गरेको लक्ष्य प्राप्ती गर्नको लागि एचआईभीको सेवा गुणस्तरीय बनाउँदै एआरटी केन्द्रहरुबाट सेवा प्रदान गर्न सहयोग पुर्याउने लक्ष्यका साथ परियोजन अगाडि बढेको संयोजक पन्तले जानकारी दिए ।
कार्यक्रममा बोल्दै प्रमुख अतिथि एवं जिल्ला समन्वय समितिका संयोजक लक्ष्मण बहादुर सिंहले सहयोगि निकायले संक्रमितहरुलाई सुरुदेखि अन्तिमसम्म पूणर्रुपमा सहयोग गर्नुपर्ने बताए । परियोजनाले काम गर्दा यहाँको ठाउँ र एचआईभी संक्रमितहरुको वास्तविक समस्याका बिषयमा जानकारी लिएर आफ्ना कार्यक्रमहरु अगाडि बढाउनु पर्ने संयोजक सिंहले बताए ।
लामो समय एचआईभीको क्षेत्रमा काम गर्दै आएकी कमला मल्लले एचआईभी संक्रमितका बालबालिकाहरुको संरक्षणको बिषय टड्कारो आवश्यकता रहेकाले यसमा सबैको ध्यान जानु पर्ने बताइन् । उनले पालिकाहरुले समेत एचआईभी संक्रमितहरुका लागि सहयोग गर्नुपर्ने बताइन् । मल्ल स्वयं एचआईभी संक्रमित हुन् ।
डोटीमा हाल ४९१ जना एचआईभी संक्रमित रहेका छन् । उनीहरु सबै नियमित एआरटीको पहुँचमा रहेका छन् ।
