गणेश मौनी
सिलगढी/नयाँ बर्ष २०८० को अवसरमा शुभकामना आदानप्रदान गर्ने र मौलिक कला संस्कृतिको संरक्षण, प्रवर्द्धन तथा प्रचार प्रसार गर्ने उद्देश्यले डोटीको सिलगढीमा बृहत सास्कृतिक कार्यक्रमको आयोजना गरिएको छ ।
दिपायल सिलगढी नगरपालिकाको समन्वयमा सुदूरपश्चिम कला केन्द्र, डोटीले सिलगढी स्थित ईन्द्रचोकमा शनिबार बृहत सांस्कृतिक कार्यक्रमको आयोजना गरेको हो ।
मौलिक कला संस्कृतिको संरक्षण तथा संवर्द्धन गर्नु आम नागरिकको दायित्व रहेको दिपायल सिलगढी नगरपालिकाका नगर प्रमुख बाजि सिंह खड्काले बताए ।
कार्यक्रमका प्रमुख अतिथि समेत रहेका नगर प्रमुख खड्काले डोटीमा थुप्रै ईतिहास बोकेका पर्यटकीय, धार्मिक एवं ऐतिहासिक स्थलहरु रहेका छन् तिनीहरुको संरक्षण गर्न स्थानीय सरकार पछि नहट्ने समेत बताएका छन् ।
लोप हुन लागेको डोटेली कला संस्कृतीको संरक्षण गर्नुका साथै नयाँ पुस्तामा हस्तान्तरण हुन सहयोग पुगोस् भन्ने हेतुले बृहत सांस्कृतिक कार्यक्रमको आयोजना गरिएको सुदूरपश्चिम कला केन्द्र डोटीका अध्यक्ष प्रिन्स नेपालीले बताए ।
सांस्कृतिक कार्यक्रममा स्थानीय मौलिक संस्कृति झल्किने खालका हुड्केली, नेवार समुदायको लाखे नाचँ, पुतला नाच, डेउडा खेल, भुवा खेलहरु प्रर्दशन गरिएका थिए ।
