गणेश मौनी,
डोटी/चैत्र १७ गते देखि संचालन हुने माध्यामिक शिक्षा परीक्षा (एसईई) का लागि डोटीमा एक परीक्षा केन्द्र थप गरिएको छ ।
एसईइ परीक्षा संचालनका लागि ११ वटा परीक्षा केन्द्र रहेको डोटीमा यस वर्ष देखि सायल गाउँपालिका वडा नम्बर ५ मा रहेको ओम आधारभूत बिद्यालय सुन्डमा नयाँ परिक्षा केन्द्र थप भए संगै डोटीमा १२ वटा परीक्षा केन्द्र रहने शिक्षा विकास तथा सम्मन्वय इकाई डोटीका शाखा अधिकृत रामदत्त भट्टले बताएका छन् ।
बिगतका बर्षहरुमा जस्तै यस बर्ष पनि डोटीमा पद्म पब्लीक मुक्तीनारायण माबि सिलगढी, दिल्पेश्वर माबि दिपायल, सुजङ, बोर्डिङ स्कुल राजपुर, रामपुर माबि बुडर, राधाकृष्ण माबि गोपघाट, बर्छैन माबि बर्छैन, दुर्गा माबि लमौते, सरस्वती माबि सानागाउँ, शारदा माबि मौवा, झिमेमालीका माबि वायल, खत्याडी माबि खत्याडी चमराचौतारामा परीक्षा केन्द्रहरु राखिएका छन् भने नयाँ केन्द्रको रुपमा ओम आधारभूत बिद्यालय सुन्डलाई राखिएको शाखा अधिकृत भट्टले बताए ।
यस बर्षको एसईई परीक्षामा डोटीबाट ४ हजार ९ जना बिद्यार्थीहरु सहभागि हुने भएका छन् । जसमा नियमित तर्फ छात्रा १ हजार ६ सय ५१, छात्र २ हजार १ सय २१ ग्रेडबृद्धि तर्फ छात्रा ३८ छात्र २४ रहेका छन् भने प्राबिधिक तर्फ छात्रा ७० छात्र १ सय ५ जना बिद्यार्थीहरु सहभागि हुने समेत शाखा अधिकृत भट्टले बताए ।
राष्ट्रिय परीक्षा बोर्डको निणर्य अनुसार एसईई परीक्षा चैत्र १७ गतेदेखि २९ गतेसम्म सञ्चालन हुने भएको छ । परीक्षा बिहान ८ बजे देखि ११ बजे सम्म हुने छ ।
