खगेन्द्र सिंह,
डोटी, चैत २१/डोटीको झिंग्रानामा प्रदेश स्तरिय नेचर गाईडको आधारभुत तालिम सुरु भएको छ । प्रदेश पर्यटन विकास कार्यक्रम कार्यान्वयन इकाई धनगढीको आयोजना तथा पूर्वीचौकी गाउँपालिका डोटी, सायल गाउँपालिका डोटी, खप्तडछान्ना गाउँपालिका बझाङ्ग, राष्ट्रिय प्रकृति संरक्षण कोष शुक्लाफाँटा र खप्तड राष्ट्रिय निकुञ्जको सहकार्यमा बुधबारदेखि सुरु भएको तालिम ७ दिनसम्म संचालन हुने भएको छ ।
स्थानीय स्तरमा रोजगारको सृजना होस् भन्ने उद्देश्यले तालिमको आयोजना गरिएको प्रदेश पर्यटन विकास कार्यक्रम कार्यान्वयन इकाई धनगढीका प्रमुख डबल बहादुर बोहराले बताए । तालिमबाट सुदूरपश्चिमको पर्यटन प्रवर्द्धनमा टेवा पुग्ने बोहराले बताए ।
आन्तरिक तथा बाह्य पर्यटकहरुलाई सूदूरपश्चिमका पर्यटन गन्तव्यसम्म पुग्न तालिमबाट उत्पादन भएका गाईडहरुका कारण सहज हुने र गाईडहरुले पनि रोजगारी पाउने कार्यक्रमका प्रमुख अतिथि पूर्बीचौकी गाउँपालिका वडा नम्बर २ का वडा अध्यक्ष योगेन्द्र बहादुर ठकुल्लाले बताए ।
झिंग्राना स्थित खप्तड होमस्टेमा संचालन भइरहेको तालिममा प्रदेशभरीका ३० जना सहभागी रहेका छन् । स्थानीय युवाहरुका लागि महत्वपूर्ण तालिम रहेको पर्यटन व्यवसायी दिपक बहादुर खड्काले बताए ।
