डोटी, असोज- ३१,
नेपाली कांग्रेसको १५औँ महाधिवेशनअन्तर्गत आगामी असोज ३ गतेदेखि सुरु हुने अधिवेशनलाई स्वच्छ, निष्पक्ष, मर्यादित र सौहार्दपूर्ण वातावरणमा सम्पन्न गर्नका लागि सबै क्रियाशील सदस्य, नेता तथा कार्यकर्ताहरूलाई सक्रियताका साथ सहभागी हुन डोटी कांग्रेसका तीन गाउँ-नगरपालिका कार्यसमितिले निर्णय गरेकाे छ ।
असोज ३ गते हुने गाउँ-नगर वडा अधिवेशन, असोज ७ गते हुने गाउँ-नगरपालिका अधिवेशन तथा असोज १० गते हुने प्रदेश सभा क्षेत्रीय अधिवेशन/प्रतिनिधि सभा क्षेत्रीय अधिवेशनमा सक्रियरूपमा भाग लिने डाेटीकाे दिपायल सिलगढी नगरपालिका, केआईसिंह गाउँपालिका र पूर्वीचाैकी गाउँपालिकाका नेपाली कांग्रेस गाउँ-नगरपालिका कार्य समितिले बुधबार निर्णय गरेकाे हाे ।
अधिवेशनलाई व्यवस्थित र प्रभावकारी रूपमा सम्पन्न गर्न सम्बन्धित पालिका कार्यसमितिहरूले पार्टीका नेता, कार्यकर्ता, क्रियाशील सदस्य तथा शुभेच्छुकहरूलाई सक्रिय रूपमा परिचालन गर्ने समेत निर्णय गरेका छ ।
अधिवेशनका क्रममा पार्टीको लोकतान्त्रिक संस्कार, विधि, पद्धति र आन्तरिक एकतालाई मजबुत बनाउँदै सबै तहका नेता तथा कार्यकर्ताबीच आपसी समझदारी र सहकार्य कायम गर्नेमा समेत जोड दिइएको छ।
अधिवेशनलाई प्रतिस्पर्धाभन्दा सहकार्य र व्यक्तिगत स्वार्थभन्दा पार्टी हितलाई प्राथमिकतामा राखेर सम्पन्न गर्न पार्टीका स्थानीय तहहरूले आह्वानसमेत गरेका छन्।
पालिका कार्यसमितिहरूले अधिवेशनमा सहभागी हुने सम्पूर्ण प्रतिनिधि, क्रियाशील सदस्य तथा पार्टीका नेता-कार्यकर्तालाई तोकिएको मिति, समय र स्थानमा उपस्थित भई अधिवेशन सफल बनाउन सहयोग गर्न आग्रह गरेका छन् ।
नेपाली कांग्रेसको आन्तरिक लोकतन्त्रलाई थप सुदृढ बनाउने महत्वपूर्ण अवसरका रूपमा लिइएको अधिवेशनलाई स्वच्छ, निष्पक्ष, अनुशासित र सौहार्दपूर्ण ढंगले सम्पन्न गर्ने प्रतिबद्धता स्थानीय तहका पार्टी नेतृत्वले व्यक्त गरेका छन् ।
