मंसिर– १५,
डोटी/लैङ्गिक हिंसा बिरुद्धको १६ दिने अभियान अन्तर्गत जनप्रतिनिधि तथा सरोकारवाला निकायसंग अन्तरक्रिया कार्यक्रम सम्पन्न गरिएको छ ।
साथी संस्थाको प्राविधिक सहयोग दिपायल सिलगढी नगरपालिकाको समन्वयमा संचालित सशक्त महिला समृद्ध नेपाल परियोजना अन्तर्गत सेफ हाउस डोटीले नगरपालिकामा सोमबार सो कार्यक्रम सम्पन्न गरेको हो ।
अन्तरक्रिया कार्यक्रममा बोल्दै जिल्ला समन्वय समितिका संयोजक लक्ष्मण बहादुर सिंहले लैङ्गिक हिंसा अन्त्यका लागि तीन पुस्ते सम्बाद संचालन गर्नुपर्ने र हिंसा अन्त्य गर्न पुरुषहरुले पनि सहयोग गर्नुपर्ने बताए ।
कार्यक्रममा बोल्दै दिपायल सिलगढी नगरपालिकाका उपप्रमुख कलावती साउँदले सबैको सहयोगले हिंसा न्युनिकरण गर्न सकिने र कुनैपनि हिंसाजन्य घटना भएमा पालिकामा रहेको न्यायिक समितिमा समेत सम्पर्क गर्न बताइन् ।
‘प्रविधिको सहि प्रयोग गरौं, लैङ्गिक हिंसा अन्त्य गरौं’ भन्ने मुल नाराका साथ मंसिर ९ गतेदेखि २४ गतेसम्म लैङ्गिक हिंसा बिरुद्धको १६ दिने अभियान संचालन भइरहेको छ ।
अभियान अन्तर्गत सेफ हाउस डोटीले दिपायल सिलगढी नगरपालिका वडा नम्बर १ तिखामा पारिवारीक तथा समुदाय सम्बाद कार्यक्रम, वडा नमबर ८ र ९ मा अन्तरक्रिया कार्यक्रम समेत गरिसकेको सेफ हाउस डोटीका प्रमुख बन्दना बमले जानकारी दिइन् ।
